Sunday, April 15, 2018

සුභ පැතුම් යැවීමේදී මේ ගැනත් සිතන්න

අලුත් අවුරුද්ද, වෙසක් හා පොසොන් පොහොයන්, නත්තල, උපන්දිනය, යම් යම් ජයග්‍රහණ ලැබීම්වල ආදීයේදි ඔබට සුභ පැතුම් බොහෝ ලැබී ඇති; ඔබත් බොහෝ අයට සුභ පැතුම් යවා ඇති. ඉස්සර නම්, වෙසක් සුභපැතුම් පත් (වෙසක් කාඩ්) ආදි සුභ පැතුම් පත් තැපෑලෙන් යැව්වත්, අද වන විට ඊමේල්, එස්එම්එස්, ෆේස්බුක් හෝ විවිධ "මැසෙන්ජර්" ඇප් හරහා මෙම සුභපැතුම් හුවමාරු වේ. එය එක්තරා විදියක දුක්ඛිත තත්වයකි. තැපැලෙන් යම් සුභපැතුමක් ලැබෙන විට දැනෙන සතුට ඇත්තෙන්ම විද්‍යුත් වශයෙන් ලැබෙන ඒවායෙන් ලැබෙන්නේ නැත. ඒ නිසා අඩුම ගණනේ අපට ඉතාමත්ම හිතවත් අයට හෝ තැපෑලෙන් සුභපැතුම් යැවීමට හැකි නම් එය වැදගත් වේ. වසරක් තුල අප විවිධ දෑ වෙනුවෙන් වියදම් කරන ප්‍රමාණය බැලුවහම මේ සඳහා වැය වන මුදල සොච්චමකි.

බොහෝ දෙනා එතරම් නොතැකුවත්, සුභපැතුම් යැවීමේ විශාල දෝෂයක් නොදැනුවත්වම සිදු වේ. එනම්, අර ගෙවල්වලට අවුරුදු කෑම අහල පහල ගෙවල්වලින් එවන විට, එම කෑම පිඟන්ම මාරු කර වෙනත් ගෙවල්වලට යවන්නා සේ සුභපැතුම්ද එසේ "ෆෝවර්ඩ්" කරයි. ඇත්තටම එය කිසිසේත් නොකළ යුත්තකි. සුභපැතුමක් යනු යමෙකු වෙනුවෙන් තම සිතේ අවංක සතුටු සිතින් හට ගත් අදහසක් විය යුතුය. අප සුභපැතුම් දහස් ගණනකට යවන්නේ නැහැනෙ (ජනපති, අගමැති, නලුනිලියන් ආදි අය විසින් ලක්ෂ සංඛ්‍යාත පිරිසකට යවන සුභපැතුම් ගැන නොවේ මා කතා කරන්නේ). ඉතිං යවන කෙනා ගැන අප දන්නා නිසා ඔහුට අදාල වන සේ යමක් ලිවිය හැකි නම් එය ඉතා වටිනේය. එම සුභපැතුම ලබන කෙනාගේ හදවතට එය දැනෙනු ඇත මොකද එයා වෙනුවෙන්ම ලියූ එකක්නෙ.

අපේ දුරකතන හා ඊමේල්වලට ඉතා ලස්සන සුභපැතුම් ඇත්තටම ලැබේ. සමහරවිට එකම "ලස්සන" සුභපැතුමම කිහිප දෙනෙකුගෙන්ම ලැබේ අකුරක්වත් වෙනසක් නැතිව. කොතරම් ලස්සන වුවත්, එවන් සුභපැතුමක අර්ථය සුන්ය; එහි අවංක සුභපැතුමක් නැත. තවත් එකෙකුගේ හදවතේ හටගත් දෙයකි එය. ඔබට සුභ පැතුමක් ලස්සනට ලියන්නට නොහැකි නම් ඒ ඒ කෙනාට ගැලපෙන අයුරින් "ෂෂී නංගියේ ඔබට සුභ අලුත් අවුරුද්දක් වේවා", "මචං සුසාන්, උඹටයි උඹේ පවුලේ අයටයි සතුට නිරෝගිකම සපිරි සුභ නව වසරක්" වැනි ඉතා සරල ඔබේම සුභපැතුමක් යවන්න. එවැනි සරල එකක් යැවීමට බැරි නම්, තවෙකෙකුගේ සුබපැතුමක් ෆෝවර්ඩ් කරනවාට වඩා කිසිවක් නොයවා සිටින එක හොඳය. දැන් කලක සිට මා නම් කිසිම හිතවතෙකුට සුභපැතුමක් යවන්නේ නැහැ අර විදියට කොපි කර සුබපැතුම් එවන බව දැනගත් විට.

අපව වැදගත් සේ දැනේ නම්, විනාඩියක් වැනි කෙටි කාලයක් යොදවා කෙටි සුභපැතුමක් ලිවීමට බැරි කමක් නැහැනෙ. කොල්ලෙකු තමන්ගේ පෙම්වතියට කොතරම් ලස්සන සුභපැතුමක් සකස් කර ගෙන යවන්නට උත්සහ කරනවාද බලන්න. සමහරවිට මිතුරන්ගෙන්ද අදහස් හා වචන ඉල්ලා සිටිනවා (මාද ඒ කාලේ මිතුරන්ට එවන් දේට උදව් කර තිබෙනවා). ටක්කෙටම රෑ 12 බලාගෙන සිට සුභපැතුම යැවීමට පෙරුම්පුරා ගෙන සිටිනවා. එය හොඳය (ජීවිත කාලයටම එවන් සැලකිල්ලක් පෙම්වතියට/බිරිඳට ලබා දෙන්නට උත්සහ කළ යුතුය). එතරම්ම කැපවීමක් ඇම්මක් නැති වුවත්, වෙනත් හිතවතෙකුට වුවද සුභපැතිය යුත්තේද එවන් සැලකිල්ලකිනි.

ඇත්තටම කෙනා කෙනාට ගැලපෙන අයුරින් සුභපැතුම් ලිවීම එතරම් අපහසු කටයුත්තක් නොවේ. ඒ කෙනා බබෙකු ලැබෙන්නට සිටින කෙනෙකු විය හැකිය; ළඟදී පිටරටකට යෑමට සිටිය හැකියි; ළඟඳී විවාහ වූ කෙනෙකු විය හැකියි; යම් අසනීප තත්වයකින් පෙලිය හැකිය; අරක්කු බීම ආදී ප්‍රකට කරදරකාරී දුර්ගුණයක් ඇති කෙනෙකු විය හැකිය. මේ ආදී ලෙස සෑම පුද්ගලයාම සුවිශේෂි වේ. ඉතිං, ඒ ඒ අයට දැනෙන්නට දෙයක් ලිවිය හැකියි. උදාහරණයක් ලෙස, සිතන්න ඔබේ මිතුරෙකු සිටිනවා කියා තමන්ගේ කුඩා දරුවන්ට වඩා මුදල් සෙවීමට ප්‍රමුඛතාවක් ලබා දෙන; ඔහුගේ බිරිඳද එලෙසමයි කියා. ඇත්තටම එවැනි මිතුරෙකුට අද මා සුභපැතුමක් යැව්වා "දරුවන් ජීවිතේ ඉතා වැදගත් සේ හිතෙන ‍ඔවුන් සමඟ වැඩිපුර කාලයක් ගත කරන්නට සිතෙන තරමට මොලේ පැහැදෙන සුබ නව වසරක් වේවා" කියා. එය ලියා විනාඩියක් යන්නට පෙර "එල එල" කියා ප්‍රතිචාරයක් ඔහුගෙන ලැබුණි (ඒ කියන්නේ එය ඔහුට දැනී තිබේ). අරක්කු සිගරට් බොන මාගේ තවත් හිතවතෙකුට මා අද සුභ පැතුවේ "අරක්කු සිගරට් ගඳින් තොර මිනිස් සුවඳින් පිරි ලෝකයක සාමාජිකයෙක් වන්නට වරම් ලැබෙන සුබ නව වසරක් වේවා" කියාය. මේ ආදි ලෙස සෑම කෙනෙකුටම යැවූයේ ඔවුනට අවංකවම සුභ පැතුමක්ම සහිත සුබපැතුමකි. කවියකින් සුබපැතුමක් එවා තිබුණු අතර, ඇයට මාද සුභ පැතුවේ කවියකිනි.

එනිසා කාර්යබහුලත්වයෙන් පිරි ජීවිතය තුල යම් කුඩා කාලයක් වැයකොට රසවත් කෙටි තමන්ගේම සුභපැතුමක් ලිවීමෙන් මනසටද සැහැල්ලුවක් ලැබේ.

2 comments:

  1. හරියටම හරි..ඇත්ත..වටිනා ඔවදනක් සුභ අලුත් අවුරුද්දක් වේවා..සියලු පැතුම් ඉ‍ටුවෙන්න තරම් යමක් කරලා තියනවා ඔබතුමා,ඔබට හැකි උපරිමෙන්ම.

    ReplyDelete
    Replies
    1. ආ... ෂමින්ද... දැනුම නිවහල්බව සතුට විනිවිද යන සමාජයක් තැනීමට ශක්තිය අධිෂ්ඨානය සැම තුල තව තවත් දැඩි වන සුභ කාලයක් මේ නව වසරත් සමඟ උදා වේවා කියා මාද ඔබට සුභ පතනවා. හැමදාමත් මා දිරිගැන්වීමටද තුති වේවා.

      Delete