Friday, June 19, 2015

මෝහනය / mohanaya (Hypnosis) - 6

එල්මන් ඉන්ඩක්ෂන්

“මං කියන දේට හොඳින් ඇහුම්කන් දී මා කියන සරල දේවල් පුළුවන් තරම් හොඳින් කිරීමට පමණයි ඔබට තියෙන්නේ. වෙන වෙන දේවල් ගැන සිතන්න උත්සහ කරන්න එපා.”

“හරි... දැන් සෙමින් ගැඹුරු හුස්මක් ගන්න; හුස්ම පිට නොකර ටික වේලාවක් ඉන්න. [තත්පර දෙකක් පමණ නිහඬව සිටින්න; ඔ‍රලෝසුවක් දිහා බලාගෙන කාලය මැනීම අනවශ්‍යයි.] හුස්ම පිට ‍කරන කොට ඔබේ ඇස් දෙකත් වහගන්න. ඔබේ මුළු ශරීරයටම සැහැල්ලු වෙන්න ඉඩ හරින්න. ඔබට හැකි පමණ ශරීරය සැහැල්ලු කරන්න.”

“දැන් ඔබේ අවධානය ඔබේ ඇස දෙසට යොමු කරන්න. ඇස හා ඇස අවට ප්‍රදේශය හා මාංශ පේශීන් ලිහිල් කරන්න. ඒවාට සැහැල්ලු වෙන්නට ඉඩ හරින්න එම පේශින් වැඩ නොකරන මට්ටම එන තුරුම. අන්න හරි... ඇස හා ඒ අවට හොඳටම සැහැල්ලුයි නම්, ඔබට ඇස් අරින්නට දැන් බැරිවෙනවා. ඔබ එම සැහැල්ලුවේ සිටින තුරු එම පේශින් වැඩ කරන්නේ නැහැ. ඔබට විශ්වාසයි නම් දැනටමත් ඇස හා ඒ අවට හොඳට සැහැල්ලුයි කියා...  ‍ඇස් අරින්න බැහැ නේද කියලා ඔබම ටෙස්ට් කරල බලන්න. [තත්පර දෙක තුනක් පමණක් ඔහුට දෙන්න එම උත්සහය කරන්නට. ඇත්තටම ‍‍හැමවිටම සිදුවන්නේ මෝහනලාභියාට ඇස් අරින්න උත්සහ කළත් ඇස් අරින්නට බැරි බවකි. එහෙත් ඔහුට බොහෝ වෙලාවක් එය කර කර ඉන්නට ඉඩ දෙන්න එපා මොකද ටික වෙලාවක් යන විට අනිවාර්යෙන්ම ඔහුට ඇස හරින්නට පුළුවන් කම ලැබෙනවා. කලාතුරකින් කියූ සැටියේම ඇස් අරන අයත් සිටිය හැකියි. එවිට, ඔහු තරමක “අමාරුකාරයෙකු” විය හැකියි. එක්කෝ ඔහුට මෝහනය ගැන තවමත් බිය සංකා තිබේ; නැතහොත් ඔහු ඔබව අභියෝගයක් ලෙස සලකන කෙනෙකු විය හැකියි; නැතහොත් ඔබ කියපු දේවල් ඒ විදියට පිළිපැද නැත. එවැනි අයෙකුට සමහරවිට වෙනත් ඉන්ඩක්ෂන් ක්‍රමයක් යෙදීමට සිදු වේ. මෙවැනි අවස්ථාවල කළ හැකි දේ පොතේ පසුවට සඳහන් වේ.] හරි... දැන් ටෙස්ට් කළා ඇති.

“දැන් මට අවශ්‍යයි ඔබේ ඔය ඇස්වල තිබෙන ලිහිල් බව... සැහැල්ලුව... ඔබේ මුළු ශරීරය පුරාම ඇති කරගන්නට. [ඇත්තටම ලිහිල් බව හා සැහැල්ලුව යන වචන දෙකේම තේරුම එකයි. රිලැක්සේෂන් කියන්නෙත් එයයි. කියන දේට ගැම්මක් (ඉෆෙක්ට් එකක්) ගන්න මේ විදියට වචන දෙකම එකවර යොදාගන්නේ.] ඔව්... ඔබේ හිස මුදුනේ සිට දෙපතුල දක්වාම එම ගැඹුරු සැහැල්ලුව ඔබේ මුළු ශරීරය පුරාම පවතින්නට ඉඩ දෙන්න. අන්න හරි...”

“බොහොම හොඳයි... දැන් මේ තිබෙන ශාරීරික සැහැල්ලුව තවත් වැඩි කරගමු. මං මොහොතකින් ඔබට කියනවා ඇස් දෙක ඇරලා වහගන්න කියලා. ඔබ එවිට මා කියන විදියට ඇස් දෙක ඇරල වහගන්න. එලෙස ඇස් ඇරල වහගන්න කොට ඔබ දැන් මේ සිටින සැහැල්ලුව වගේ දස ගුණයක සැහැල්ලුවක්... ඔව් දස ගුණයක් සැහැල්ලුවක් ඔබේ ශරීරයට දැනෙන්නට එය ඉඟියක්... සංඥාවක්... බවට පත් වෙනවා. ඔබට කරන්න තියෙන්නෙ ඉතාම පහසු දෙයක්. එම සැහැල්ලුව ලැබීමට ආශාවක්... ඕනකමක්... ඇති කරගන්න. එවිට එය ඉබේම සිදු වේවි. හරි... දැන් ඇස් අරින්න... [ඔබ ඔහුගේ ඇස් දෙස බලන්න ඇත්තටම ඔහු ඇස් අරිනවාද කියා. ඔහු ඇස් ඇරිය යුතුයි ඔබ මෙතෙක් සාර්ථක නම්. ඔහු ඇස් අරින්න අපහසුවෙන් පෙළෙනවා නම්, ඔහුට මෙලෙස තරමක උස් හඩකින් කියන්න “හරි මං දැන් කිව්වා ඔබට මොහොතකට ඇස් අරින්න කියා. ඔබ මා කියන දේ ඒ කියන විදියටම කරන්න ඕන. එනිසා දැන් ඔබට මා කියන නිසාම ඇස් අරින්න පුළුවන්. ඒකනිසා දැන් මොහොතකට ඇස් අරින්න.”  මේ අවස්ථාවේ හෝ වෙනත් කිසිම අවස්ථාවක කේන්තියක් තරහවක් මෝහනලාභියාට පෙන්වන්නද එපා. ඔහු ඇස් අරීවි. එවිටද ඇස් ‍අරින්නේ නැති විට කළ හැකි දේවල් පොතේ පසුවට සඳහන් වේ. තවද, ඔහු ඇස් අරින විට, ඔබට තවත් වැදගත් දෙයක් කළ හැකියි. එනම්, ඔහුගේ ඇස් ඉදිරියෙන් තරමක් දුරින් ඔබේ අතක අත්ල පෙදෙස ඔහුගේ මුහුණ පෙදෙසට වන සේ තබා ගන්න. ඔහුගේ මුහුණ ස්පර්ශ කරන්න එපා. එවිට ඔහු ඇස් අරින විට පෙනෙන්නේ ඔබේ අත්ල වේ. ඉන් ඔහුගේ අවධානය කාමරයේ හෝ වටපිටාවේ වෙනත් දේවලට යොමු වීම වැලැක්විය හැකි සේම, තව මොහොතකින් ඔහුට ඇස් වසාගන්නට යැයි කටින් විධාන කරන විට, එය ඔබේ අත්ල ඔහුගේ ඇස් ඉදිරියේ සෙමින් පහළට ගමන් කරවීමෙන් අතින්ද වක්‍රාකාරයෙන් ඔහුට ඇස් වසන්නට කරන ඉඟියක් ලෙස ක්‍රියාත්මක වේ. තත්පරයක් පමණ ඇස් ඇරන් සිටින්නට දෙන්න.] හරි... දැන් ඇස් වසා ගන්න... ශරීරය දස ගුණයක සැහැල්ලුවක් ඇති කර ගන්න. එම සැහැල්ලුව මුළු ශරීරය පුරාම පැතිරීම ඔබට දැන් දැනෙනවා. බොහෝම හොඳයි...”

“දැන් අපි ඔබ මේ දැන් සිටින ශාරීරික සැහැල්ලුව තවත් වැඩි කර ගමු... ගැඹුරු කර ගමු... නැවතත් ‍ඉස්සෙල්ලා වගේම මොහොතකින් මං කියනවා ඇස් දෙක ඇරල වහ ගන්න කියලා. ඔබ එසේ ඇස් ඇරල වහගන්න කොට දැන් මේ ඔබ සිටින ශාරීරික සැහැල්ලුව සනීපය වගේ දෙගුණයක සැහැල්ලුවකට ගැඹුරකට ඔබව පත්වෙනවා. හරි... දැන් ඇස් අරින්න. [පෙර සේම අත්ල භාවිතා කරන්න. තත්පරයක් ඇස් ඇර ඉන්නට දෙන්න.] හරි... දැන් ඇස් වහන්න. [එසේ කියන ගමන් ඔබේ අත්ල සෙමින් ඔහුගේ ඇස් ඉදිරියෙන් පහළට ගේන්න.] ශරීරය දෙගුණයක් ගැඹුරට සැහැල්ලු වෙන්න ඉඩ හරින්න.”

 “හරි... තව එක සැරයක් අපි ඒක කරමු. තව මොහොතකින් මං කියනවා ඇස් දෙක ඇරල වහන්න කියලා. ඔබ ඇස් ඇරල වහගන්න කොට මේ දැන් දැනෙන සැහැල්ලුව... රිලැක්සේෂන් එක... වගේ දෙගුණයක සැහැල්ලුවක් සනීපයක් ඔබට දැනෙනවා. දැන් ඇස් අරන්න [පෙර කී දේ නැවත මෙහිදීද කරන්න.] ඇස් වහන්න; ශරීරයේ සැහැල්ලුව දෙගුණ කරන්න; ලිහිල්බව සනීපය දෙගුණ වන්නට ඉඩ හරින්න. අන්න හරි. බොහෝම හොඳයි. ඔබේ මෙම ශාරීරික සැහැල්ලුව දිගටම ඔබ පවත්වාගෙන යන තාක්කල් ඔබට ඔබේ ශරීරයේ මාංශ පේශින් චලනය කරන්න නොහැකි වෙනවා.”

“සුළු මොහොතකින් මා ඔබේ දකුණු අතින් අල්ලා අඟලක් දෙකක් පමණ ඉහළට ඔසවා නැවත ඔබේ උකුලට... කකුල මතට... අත් හරිනවා. [මෙය මෙලෙස කිව හැක්කේ ඔහු පුටුවක වාඩි කරවා අත් දෙක කකුල් දෙක මත තබා ඇති විටක හෝ සයනයක ඇල කරවා අත් දෙක කකුල් දෙක මත තබා ඇති විටයි. ඇත්තටම අප මෝහනය සිදුකරන්නේ බොහෝ විට මෙම ඉරියව් දෙකෙන් නිසා ගැටළුවක් නැත. නිකමට හරි ඔහුව සිටගෙන සිටන ඉරියව්වෙන් මෝහනයට පත් කරන විට, “දකුණු අත අඟලක් දෙකක් විතර ඉහළට ඔසවා අත් හරිනවා” කියා කීම ප්‍රමාණවත් වේ.] ඔබ ඇත්තටම මෙතෙක් මා කියූ දේ පිළිපැද්දා නම්... මෝහනයට පත් වීමට ඕන කමක් තිබ්බා නම්... මා ඔබේ අත එසේ ඔසවා අත් හරින විට, එම අත කොච්චර රිලැක්ස් වෙලා තිබෙන්නට ඕනෑද කිව්වොත් එය නිකං ලී කොටයක් නැතිනම් රෙදි කැබැල්ලක් අත් හරින විට බිමට වැටෙන්නාක් සේ “දඩාස් ගාලා” වැටෙන්නට ඕනෑ. එච්චරට අත පණ නැති වී තිබිය යුතුයි. අත ඔසවන විට ඔබ මට කිසිසේත් උදව් කරන්න උත්සහ කරන්න එපා. ඔබ එසේ උත්සහ කළොත් ඔබ දැනට සිටින සැහැල්ලුවෙන් ඔබව ඉවත් වේවි. ඒක නිසා අත උස්සන එක මටම කරන්න ඉඩ දෙන්න. මං අත හරින විට එය දඩාස් ගාලා වැටෙන්නට ඉඩ දෙන්න. [ඔබ දැන් කියූ ලෙසම දකුණු අත ඔසවන්න. දකුණු අත ඔසවනවා යැයි කියා වම් අත ඔසවන්න එපා. එය ඔහුට යම් අපහසුතාවක් හෝ ව්‍යාකූලතාවක් ඇති කිරීමට පුළුවන්. අත ඔසවන විට, ඔහු ඔබ වෙනුවෙන් අත ඔසවනවා නම් හෝ අත ඔසවන්න උදව් කරනවා නම්, එය ඔබට ඉතාම පහසුවෙන් දැනෙනවා. ඔබ බර පොතක් ඔසවන විට දැනෙන විදියට ඔහුගේ අත ඔසවන එක දැනෙන්නට ඕනෑ. ඔහුගේ අත ඇත්තට පණ නැතිවාක් සේ ඔබට දැනිය යුතුයි. එසේ දැනෙන්නේ නැතිනම්, ඒ කියන්නේ ඔහු අත ඔසවන්නට උදව් කරනවා නම් ඔහුට කියන්න පෙර මා සඳහන් කළ සේම “අත ඔසවන්න මට උදව් කරන්න එපා; ඔබේ අත දර කැබැල්ලක් සේ පණ නැතිව තිබෙන්නාක් සේ ඉඩ අරින්න; ඔබ උදව් කරන විට සැහැල්ලුව ඔබෙන් ඉවත් වේවි; ඒක නිසා අත පණ නැති කරන්න.” එවැනි දේ කියන්න ඔහුගේ අත මැණික් කටුවෙන් අල්ලාගෙන අත සෙමින් දෙපැත්තට පද්දන ගමන්. ඔහුගේ අත පණ නැති වන තෙක් එසේ කිය කියා එසේ අත පද්දමින් සිටින්න. අත පණ නැති ගානට ආ විට, එය ඔහුගේ කකුල මතට අත් හරින්න. එය ‍පොතක් හෝ වෙනත් පණ නැති දෙයක් වැටෙන වේගෙන් දඩාස් ගාලා වැටිය යුතුයි. මෙසේ කොතෙක් උපදෙස් දුන්නත් කළාතුරකින් ඔහුට අත පණ නැති කිරීමට බැරි වීමට පුළුවන්. එවැනි අවස්ථාවලදී කළ යුතු දේවල් පසුවට පොතේ සඳහන් වේ.]

[ඔහු ඉතා සාර්ථකවත් මුල සිටම හොඳට කියපු දේවල් කළා නම්. එය දකුණු අතට පමණක් සිදු කිරීම ප්‍රමාණවත්. එහෙත් මුල සිටම ඔහුට ඒ ඒ දේවල් කිරීමට කාලයක් ගත වූවා නම්, අත පණ නැති කිරීමට කාලයක් ගත වූවා නම්, ඉහත කළ දේ ඒ විදියටම වම් අතටත් සිදු කරන්න. පළමුව දකුණු අතට කර දෙවනුව වම් අතට කළා කියා වෙනසක් නැත. කුමන අතකට පළමුව එය සිදු කළත් කිසිදු ගැටළුවක් නැත.]

“හ්ම්ම්ම්... දැන් ඔබ ඉතා හොඳ ශාරීරක සැහැල්ලුවකින් හා සුවයකින් සිටිනවා. ඔබේ ශාරීරික සැහැල්ලුව එලෙසම පවත්වාගෙන යන්න ඉඩ හරින්න. ශාරීරික සැහැල්ලුව වගේම අපි දැන් ඔබේ මානසික සැහැල්ලුවත් වැඩි කර ගමු... ගැඹුරු කර ගමු... ඇත්තටම ඔ‍බ දැන්ටමත් හොඳ මානසික සැහැල්ලුවකින් සිටිනවා. ඒකට හේතුව ශාරීරික සැහැල්ලුව වැඩි වන විට, එය ඉබේම මානසික සැහැල්ලුවත් ඇති කරනවා. ඒවගේමයි මානසික සැහැල්ලුව වැඩිවන විට එය ඉබේම ශාරීරික සැහැල්ලුවත් ඇති කරනවා. මේ දෙක එකිනෙකාට උදව් කරමින් සැහැල්ලුව වැඩි කරගන්නවා.”

“ඔබ දැන් ඔප්පු කර පෙන්නුවා ඉතා හොඳ ශාරීරික සැහැල්ලුවක් ඔබට ඇති කරගන්න පුළුවන් කියලා. ඒ විදියටම දැන් මානසික සැහැල්ලුවත් වැඩි කරගමු. මා මොහොතකින් ඔබට කියනවා 100 සිට ආපස්සට... 100... 99... 98... 97... ආදී විදියට සෙමින්... කලබලයක් නැතිව... මට ඇහෙන්නට ගණන් කරන්න කියලා. [ඇත්තටම ඔබ ඉහත වාඛ්‍ය කියන කොට, 100... 99... 98... 97... ආදී ඉලක්කම් කියන විට, එය කිව යුත්තේද මෝහනලාභියාට එය ගණන් කරන විදිය ගැන හැඟීමක් ඇතිවන පරිද්දෙනි. එවිට, මෝහනලාභියාද එය සෙමින් නිවැරදි ආකාරයට කියන විදිය ඉගෙන ගනී.] එහෙම ගණන් කරන කොට, සෑම සංඛ්‍යාවක් පාසාම ඔබේ මානසික සැහැල්ලුව තිබෙන මට්ටමට වඩා දෙගුණයක් කරන්න. එය කරන්න පුළුවන්... ඒක තමයි ලොකුම රහසත්. එම මානසික සැහැල්ලුව ඇති වෙන්නට ඉඩ හරින්න. එහෙම මානසිකව සැහැල්ලු වන විට ඇත්තටම ඔබට ගණන් කර කර ඉන්න බවත් අමතක වෙනවා. ඔව්... තමන් ගණන් කරමින් ඉන්න ඉලක්කම් අමතක වෙලා යනවා. ඒක තමයි වෙන්න ඕන. ඉලක්කම්වලට අමතක වෙන්නට ඉඩ හරින්න. බොහෝ විට, 97 ඉලක්කම කියන විට ඔබට එය සිදු වේවි. ඊටත් කළින් වුවද ඔබට ඉලක්කම අමතක වෙන්න පුළුවන්.”

“හරි දැන් ගණන් කිරීම පටන් ගන්න 100 ඉඳන්. [දැන් මෝහනලාභියා 100 කියා කියාවි. ඔහු එය ඔබ ඔහුට ඉහත ඉගැන්වූ පරිදි කියයි. ඔබ ඉක්මනින් හෝ වැරදියට එය කිව්වා නම්, ඔහුද ‍එසේ කියනු ඇත. එමනිසා, ඉහත ඡේදයෙත් සඳහන් කළ ආකාරයට ඔබ එය නිවැරදි ලෙස ශබ්ද කර පෙන්විය යුතුයි. ඔහු එසේ සංඛ්‍යාවක් කී විගස “මානසික සැහැල්ලුව දෙගුණ කරන්න” කියා කිව යුතුයි.]

[මොහොතකින් ඔහු දෙවැනි ඉලක්කම වන 99 කියනු ඇත. එය කියූ විගස ඔබ සුපුරුදු පරිදි “මානසික සැහැල්ලුව දෙගුණ කරන්න” කියා කිව යුතුයි. ඊට අමතරව දැන් ඔබ මෙලෙසද කියන්න “දැන් ඉලක්කම්වලට අමතක වෙන්න ඉඩ හරින්න. ගණනය කරන එක අමතක කරන්න. සිත නිදහස් සැහැල්ලු කරන්න”. හැමවිටම වාගේ මෝහනලාභියා ඔබ උපදෙස් දී ඉවරවෙන තුරු ඊළඟ ඉලක්කම නොකියනු ඇත. එමනිසා ඉක්මනින් කි‍යාගෙන කියාගෙන යන්න එපා ඔහු ඊළඟ ඉලක්කම කියාවි යැයි බියෙන්.]

[ඔබ නිහඩ වූවාට පසුව, මොහොතකින් ඔහු ඊළඟ ඉලක්කම කියනු ඇත. එය කියූ විගස සුපුරුදු ලෙසම “මානසික සැහැල්ලුව දෙගුණයක් කරන්න” කියා ඔබ කිව යුතුයි. ඊට අමතරව, “ඒවාට අමතක වෙන්න ඉඩ හරින්න” කියාද කිව යුතුයි. සමහරවිට ඔහු තවත් ඉලක්කමක් හෝ දෙකක් පමණ කිව හැකිය. එසේ කීවා නම්, ඔබද “මානසික සැහැල්ලුව දෙගුණ කරන්න. ඒවාට අමතක වෙන්න ඉඩ හරින්න” කියා කියන්න ඔහු කියන සෑම ඉලක්කමකට පසුව. 97 හෝ ඊට පෙර ඔහු ඉලක්කම් අමතක කර නිශ්හබ්ද වීම උචිතයි. එහෙත් කළාතුරකින් කෙනෙකු සිටිය හැකියි ගණන් කරන එක නොකඩවාම ඉදිරියට කරගෙන යන. එවැනි අයට කුමක් කළ යුතුදැයි පසුව ඉගැන්වේ. 97 ඉලක්කමද කියූ පසු ඔබට හැ‍ඟෙන්නේ නම් ඔහු තව දුරටත් ඉලක්කම් කියාවි කියා ඔබ ඔහුට මෙසේ කියන්න “මානසික සැහැල්ලුව දෙගුණ කරන්න. ඉලක්කම් අමතක කරන්න. ඒවා මනසින් කුඩා ‍වෙන්නට... තුනී වෙන්නට ඉඩ හරින්න. ඒවා මනසින් ඉවත් කරන්න. මනසේ හා ශරීරයේ ඔබ අත් විදින සැහැල්ලුව හා සනීපය කෙරෙහි සිත යොමු කරන්න.” මෙසේ කීවාට පසුව ‍සමහරවිට ඔහු තවත් ඉලක්කමක් නොකියාවි. එහෙමත් නැතිනම්, තව එක් ඉලක්කමක් පමණක් පවසාවි. කෙසේ හෝ වේවා, ඔහුට ඉලක්කම් අමතක වූයේ නම්, ඔහු නිශ්ශබ්දව සිටිනු ඇත. ඉන්ඩක්ෂන් එක එතැනින් සම්පූර්න වේ. එහෙත්, ගණන් කිරීම නතරවන්නේ නැතිනම්, ඔබ එය නවතා දමා වෙනත් උපක්‍රමයකට යා යුතුයි. ඒ ගැන පසුව විස්තර ඇත.]

ඉහත දැක් වූයේ ඩේව් එල්මන් ඉන්ඩක්ෂන් එකයි. ඇත්තටම එල්මන් ඉන්ඩක්ෂන් එකේද තවත් ක්‍රම දෙක තුනක් ඇත. එහෙත් මා පෞද්ගලිකව භාවිතා කරන්නේද මෙයයි. එහි වරහන් තුළ ඇති කොටස් ඔබ මෝහනලාභියාට කියන්න එපා. මා වරහන් තුළ දේවල් කියා ඇත්තේ ඒ ඒ අවස්ථාවලදට ගැලපෙන මෝහනවේදියා වශයෙන් ඔබ දැනගත යුතු කරුණුයි. එහෙත් වරහන් තුළද ඔබ කිව යුතු සමහර වාඛ්‍ය ලියා ඇති අතර ඒවා පහසුවෙන් ඔබට වටහ ගැනීමට ලොකු අකුරින් හා උදෘත තුළ දක්වා ඇත. ඔබ මෙම ඉන්ඩක්ෂන් එක කටපාඩම් කරන්නට යන්න එපා. එහෙත් එය කිහිප වතාවක්ම සම්පූර්ණයෙන් කියවන්න. මෙහි ප්‍රධාන “සිද්ධි” මොනවාදැයි සිහියේ සිටින තුරු එය කියවන්න.

ඔබේ පහසුව පිණිස එම ප්‍රධාන සිද්ධි මොනවාදැයි මා පෙන්වන්නම්. පළමුව හුස්ම ගැනීම හා ඇස රිලැක්ස් කිරීම වේ. දෙවනුව ශරීරය පුරාම ඇසේ සැහැල්ලුව පැතිරවීමයි. තෙවනුව, තුන් පාරක් ඇස ඇර වසා දැමීමයි. හතරවෙනුවට ඇත්‍‍තේ අත උස්සා අත හැරීමයි. ඉන්පසුව ආපස්සට ගණන් කිරීමයි. ඔබ මෙම අනුපිළිවෙල කිසිම විටෙක වෙනස් කරන්න එපා.

එම අනුපිළිවෙල සිහියේ තබා ගත් පසු, ඔබ මෙය තනියෙන් හෝ මිතුරෙකු සමග හෝ කියවන්න. එය සාමාන්‍යයෙන් ඔබ කෙනෙකු මෝහනයට පත් කරන විට කියන ක්‍රමයටම රඟ දක්වන්න. එය වැදගත්. මෙම අවස්ථාවේදී කැමැති නම්, ඉහත ඉන්ඩක්ෂන් එක එලෙසම කොලයක ලියාගෙන හෝ ප්‍රින්ට් කරගෙන එය බලාගෙන සිදු කරන්න. නැතිනම්, ‍කොම්පියුටර් හෝ ටැබ් ෆෝන් එකක ස්ක්‍රීන් එකෙන් එය බලාගෙන රඳ දක්වන්න. මාද එය පළමු වරට පුහුණු වූයේ කොලයක ලියාගෙනයි. මාගේ මිතුරෙක් එය පුරුදු වූයේ ලැප්ටොප් එක බලාගෙන කියවීමෙන්. ඒ විදියට පළමු දෙවැනි වර කරන විට, යම් විශාල අපහසුවක් දැනේවි. එය ගණන් නොගෙන දිගටම සිදු කරන්න. එහෙත් පස් හය සැරයක් පමණ සිදු කරන විට, ඔබට නිකංම එය මතක සිටිනවා. එසේ මතක සිටියත් තවත් වාර කිහිපයක් යන තුරු අමතකවීම් තිබිය හැකියි. එය සිදුවීම ස්වාභාවිකයි. අවශ්‍ය වන්නේ ඔබට පහසුවක් දැනෙන තෙක් පුහුණුවීම සිදු කිරීමයි. ඔබට එය පහසු වූ විට, ඒ ඒ කෙනා අනුව කුඩා කුඩා සුදුසු වෙනස්කම්ද කිරීමට පහසුවෙන්ම තේරෙන්නට ගන්නවා. හැබැයි වෙනස් කම් සිදු කිරීමට මෝහනය (hypnosis) ගැන සිද්ධාන්ත කරුණුද දැන සිටීම ඉතාම වැදගත් බව සිහිතබාගන්න.

“අන්න හරි”, “බොහෝම හොඳයි” වැනි කොටස් ඉන්ඩක්ෂන් එ‍ක තුළ තිබීම වැදගත්. ඊට හේතුව වන්නේ මෝහනලාභියා ඇත්තටම කය හා මනස සැහැල්ලු කර මෝහනයට පත් වීමට දරන අවංක උත්සහය දිරි ගැන්වීමයි. එය ඔහුට මෝහනය සිදු වීමට පහසුවක් ඇති කරනවා.

තවද, නිතරම “ඔබ”, “ඔබේ” යන වචන මා භාවිතා කර තිබෙනවා. ඊට හේතුව මෝහනයට පත් වන කෙනාට දෙගෙඩියාවක් ඇති නොවිය යුතුයි අප කියන යෝජනා තුළ. එමනිසා, ඔහුට අදාල දේවල් එම “ඔබ” වැනි පද යොදා කීම වඩා යෝද්‍ය වෙනවා.

කායික හෝ මානසික සැහැල්ලුව වැඩි කරන විට අප එය දැනට තිබෙන මට්ටමට වඩා දහස් ගුණයකින් හෝ ලක්ෂ ගුණයකින් වැඩි කරන්න නොකියා බොහෝ විට දෙගුණයකින් (හා කළාතුරකින් දස ගුණය) එය සිදු කරන ලෙසයි අප කියන්නේ. ඇත්තටම බොරුවට කෙනෙකුට සිතාගත නොහැකි ප්‍රමාණවලින් සැහැල්ලුව වැඩි කරගන්නට කීවාට වැඩක් නැත. යමක දෙගුණය ගැන හොඳ අදහසක් අපට ඇති කර ගත හැකි වුවද, යමක් දහස් හෝ ලක්ෂ වාරයක් පහසුවෙන් තේරුම්ගත නොහැකිය. සමහරෙක් මෙය අවබෝධ නොකර සැහැල්ලුව දසදහස් වාරයකින් වැඩි කර ගන්න කියාද යෝජනා කරනවා. සමහරවිට ඔවුන් සිතනවා විය හැකියි අප කියන කියන ප්‍රමාණවලින් අපේ විධානය අනුවම මෝහනලාභියාට එවැනි ගැඹුරු සැහැල්ලු ඇති වෙනවා කියා. එසේ වෙන්නේ නැත. අප ඇත්තටම සිදු කරන්නේ මෝහනලාභියාටද නොදැනී ඔහුගේ සිතට දැනෙන වෙනසක් ඇති කිරීම පමණි. මෝහනලාභියාගේ සිත හෝ ගත අප කියන කියන දේ ඒ අයුරින් සිදු කරන්නේ නැත. අප ඔහුව ක්‍රමක්‍රමයෙන් මෝහන තත්වයට ගෙන යා යුතුයි.



Hypnosis (mohanaya)...

No comments:

Post a Comment